മംഗളൂരു: ഗതാഗതം തടസ്സപ്പെടുത്തുന്ന തരത്തിൽ നഗരത്തിലെ സ്‌കൂളുകൾക്ക് പുറത്ത് പാർക്ക് ചെയ്യുന്ന വാഹനങ്ങൾക്കെതിരെ നടപടി വരുന്നു. ഇത്തരത്തില്‍ ഗതാഗത തടസ്സം ഉണ്ടാക്കുന്ന വാഹനങ്ങള്‍ക്ക് എതിരെ കേസെടുക്കുമെന്ന് മംഗളൂരി സിറ്റി ഡെപ്യൂട്ടി പോലീസ് കമ്മീഷണർ (ക്രൈം ആൻഡ് ട്രാഫിക്) ബി.പി. ദിനേശ് കുമാർ വ്യക്തമാക്കി. പട്ടികജാതി-പട്ടികവർഗക്കാരുടെ പരാതികൾ പരിഹരിക്കാൻ പോലീസ് വിളിച്ച യോഗത്തിൽ സംസാരിക്കുകയായിരുന്നു അദ്ദേഹം. ഡിസിപി (ക്രമസമാധാനം) സിദ്ധാർഥ് ഗോയൽ യോഗത്തിൽ അധ്യക്ഷത വഹിച്ചു.
സ്‌കൂൾ വളപ്പിൽ വാഹനങ്ങൾ പാർക്ക് ചെയ്യാവുന്ന വലിയ ഗ്രൗണ്ടുണ്ടായിട്ടും ജെപ്പു സെൻ്റ് ജെറോസ സ്‌കൂളിന് പുറത്ത് ഗതാഗത തടസ്സം ഉണ്ടാകുന്ന വിധത്തില്‍ വാഹനങ്ങൾ പാർക്ക് ചെയ്യുന്നത് തുടരുകയാണെന്ന് ദളിത് പ്രവർത്തകൻ എസ്.പി.ആനന്ദ് യോഗത്തിൽ പരാതിപ്പെട്ടു. വലൻഷ്യയിലെ ഫാദർ മുള്ളർ ആശുപത്രിക്ക് പുറത്ത് പാർക്ക് ചെയ്യുന്ന വാഹനങ്ങളും ഗതാഗതത്തിന് തടസ്സം സൃഷ്ടിക്കുന്നതായി അദ്ദേഹം പറഞ്ഞു.
ഇത്തരം പ്രശ്‌നങ്ങൾ റിപ്പോർട്ട് ചെയ്ത എല്ലാ സ്‌കൂളുകൾക്കും പോലീസ് നിരവധി തവണ നോട്ടീസ് നൽകിയിട്ടുണ്ടെന്ന് ഡെപ്യൂട്ടി പോലീസ് കമ്മീഷണർ ബി.പി. ദിനേശ് കുമാർ പറഞ്ഞു. "ഈ നോട്ടീസുകൾ അവഗണിച്ചതിനാൽ, അത്തരം വാഹനങ്ങൾക്കെതിരെ കേസുകൾ കേസെടുക്കാന്‍ തുടങ്ങും." അദ്ദേഹം വ്യക്തമാക്കി.
